सुश्रुतसंहिता - सूत्रस्थानम् - ४६. अन्नपानविध्यध्यायः
चम्पक-किंशुक-कुरण्टकगुणाः
चम्पकं रक्तपित्तघ्नं शीतोष्णं कफनाशनम् |
किंशुकं कफपित्तघ्नं तद्वदेव कुरण्टकम् ||२८८||

निबन्धसङ्ग्रह व्याख्या (डल्हण कृत)

किंशुकं पलाशपुष्पं, कुरण्टकं सहचरपुष्पम्||२८८||

अष्टाङ्गनिघण्टु - ९. आरग्वधादिगण

सैर्यकस्तु सहचरः सर्यको मृदुपुष्पकः ||७३||
बाणः स्मृतो नीलपुष्पः धीरशौर्यकघोश्वराः

कैयदेवनिघण्टु - १. ओषधिवर्ग

सैरेयकः सहचरः सैरेयो मृदुकण्टकः ||१०४७||
कोमलप्रसवो दासी वर्णाद्यः किङ्करान्तकः | झिण्टी सहचरोऽम्लानः सैर्यकश्च महासहा ||१०४८||
रक्तपुष्पः कुरूबकः पीतपुष्पः कुरण्टकः | नीलपुष्पस्त्वार्तगलो राजसैरेयकः स्मृतः ||१०४९||
बाणस्त्वोदनपाकी स्यात् शाणकः केशरञ्जनकः | सैरेयो मधुरःस्निग्धस्तिक्तोष्णः केशरञ्जनः ||१०५०||
केश्यो बलासवातास्रकुष्ठकण्डूविषं जयेत् |१०५१|

धन्वन्तरिनिघण्टु - १. गुडूच्यादिवर्ग

सैरेयकः सहचरः सैरेयश्च सहाचरः | पीतो रक्तोऽथ नीलश्च कुसुमैस्तं विभावयेत् ||३०८||
पीतःकुरण्टको ज्ञेयो रक्तः कुरबकः स्मृतः | कुरण्टको हिमस्तिक्तः शोफतृष्णाविदाहनुत् |
केश्यो वृष्योऽथ बल्यश्च त्रिदोषशमनो मतः ||३०९||

निघण्टुशेष - २. गुल्मकाण्ड

सैरेयकः सहचरो झिण्टी सहाचरश्च सः |स तु रक्तः कुरबकः स्यात् पीतस्तु कुरण्टकः ||२४६||
नील आर्तगलो दासी बाण ओदनपाक्यपि |२४७|

निघण्टुशेषटीका व्याख्या (श्रीवल्लभगणि कृत)

सःअमिलातः सीरे भवः सैरेयः, भवे [सिद्ध. ६.३.१२३] इत्येयण्, स्वार्थिके के सैरेयकः| सह चरति सहचरः| झिम् इति रटतीति झिण्टी, पृषोदरादित्वात्| सह आचरति सहाचरः| आह च–
सैरेयकः सहचरः सैरेयश्च सहाचरः| [धन्व. वर्ग १ श्लो. २७८] इति|

भावप्रकाश-पूर्वखण्ड-मिश्रप्रकरण - ५. पुष्पवर्ग

सैरेयकः श्वेतपुष्पः सैरेयः कटसारिका | सहाचरः सहचरः स च भिन्द्यपि कथ्यते ||४०||
कुरण्टकोऽत्र पीते स्याद्रक्ते कुरबकः स्मृतः | नीले बाणा द्वयोरुक्तो दासी आर्तगलश्च सः ||४१||
सैरेयः कुष्ठवातास्रकफकण्डूविषापहः | तिक्तोष्णो मधुरोऽनम्लः सुस्निग्धः केशरञ्जनः ||४२||

मदनपालनिघण्टु - १. अभयादिवर्ग

सौरेयकः सहचरः सौरेयः किङ्करातकः | दासीसहचरः झिण्टी शैर्यको मृदुकण्टकः ||३०४||
रक्तपुष्पः कुरुवकः पीतपुष्पो कुरण्टकः | नील आर्तगलः प्रोक्तो बाणा गोदनपाक्यपि ||३०५||
सैरेयः कुष्ठवातास्रकफपाण्डुविषापहः | तिक्तोष्णो मधुरः केश्यः सुस्निग्धः केशरञ्जनः ||३०६||

मदनादिनिघण्टु - १४. चतुर्दशगण

राजसैरेयकश्चान्यो नीलपुष्पार्थ सैर्यकः | बाणम्लानः सहचरः केशरञ्जनकस्तथा ||८||
सैर्यकस्तिक्तमधुरः स्निग्धोष्णकफवातजित् | केश्याखालित्यपालित्यबाधास्तथा दारुणनाशनः ||९||

राजनिघण्टु - १०. करवीरादिवर्ग

कण्टः करण्टो झिण्टी सा वन्या सहचरी तु सा पीता | शोणी कुरवकनाम्नी कण्टकिनी शोणझिण्टिका चैव ||१३६||
साऽन्या तु नीलझिण्टी नीलकुरण्टश्च नीलकुसुमा च | बाणी बाणा दासी कण्टाऽऽर्तगला च सप्तसञ्ज्ञा स्यात् ||१३७||
झिण्टिकाः कटुकास्तिक्ता दन्तामयशान्तिदाश्च शूलघ्न्यः | वातकफशोफकासत्वग्दोषविनाशकारिण्यः ||१३८||

सोढलनिघण्टु - नामसङ्ग्रह (प्रथम भाग) -  विषयसंग्रह - १. गुडूच्यादिवर्ग

सैरेयके सहचरः सैरेयश्च सहाचरः ||२७५||
झिण्टी च सैर्यकश्चैव मृदुपुष्पक एव च | पीतो रक्तः सितो नीलः कुसुमैस्तं विभावयेत् ||२७६||
पीतः कुरण्टको ज्ञेयो रक्तः कुरवकः स्मृतः | नीलाश्चार्तगलो दासी बाण ओदनपाक्यापि ||२७७||

सोढलनिघण्टु - गुडूच्यादिवर्ग सङ्क्षिप्त गुण

रास्नाश्वगन्धा वर्षाभूस्तथा सहचरौ बला | प्रसारणी शतावर्यावेरण्डश्चापि सर्वशः ||२०||
आस्थापनं कल्पमेतत्तथा वातेऽनुवासनम् |तैलं कषायपेष्यैस्तु सक्षीरं साधितं जयेत् ||२१||
वातशोणितमर्शांसि ज्वरमुन्मादमर्दितम् |कट्यूरुपार्श्वपृष्ठार्तिशोषं शोफं सवेपथुम् ||२२||
गुडूच्यादिरयं वर्गः प्रथमः परिकीर्तितः |ऊर्ध्वाधोदोषहरणः सर्वामयविनाशनः ||२३||